PSA 11 | QuranAlive

7 verses

1 לַמְנַצֵּחַ לְדָוִד בַּיהוָה חָסִיתִי אֵיךְ תֹּאמְרוּ לְנַפְשִׁי נוּדוּ נוּדִי הַרְכֶם צִפּוֺר :

2 כִּי הִנֵּה הָרְשָׁעִים יִדְרְכוּן קֶשֶׁת כּוֺנְנוּ חִצָּם עַל־ יֶתֶר לִירוֺת בְּמוֺ־ אֹפֶל לְיִשְׁרֵי־ לֵב :

3 כִּי הַשָּׁתוֺת יֵהָרֵסוּן צַדִּיק מַה־ פָּעָל :

4 יְהוָה בְּהֵיכַל קָדְשׁוֺ יְהוָה בַּשָּׁמַיִם כִּסְאוֺ עֵינָיו יֶחֱזוּ עַפְעַפָּיו יִבְחֲנוּ בְּנֵי אָדָם :

5 יְהוָה צַדִּיק יִבְחָן וְרָשָׁע וְאֹהֵב חָמָס שָׂנְאָה נַפְשׁוֺ :

6 יַמְטֵר עַל־ רְשָׁעִים פַּחִים אֵשׁ וְגָפְרִית וְרוּחַ זִלְעָפוֺת מְנָת כּוֺסָם :

7 כִּי־ צַדִּיק יְהוָה צְדָקוֺת אָהֵב יָשָׁר יֶחֱזוּ פָנֵימוֺ :

1/7 verses