PSA 26 | QuranAlive

12 verses

1 לְדָוִד שָׁפְטֵנִי יְהוָה כִּי־ אֲנִי בְּתֻמִּי הָלַכְתִּי וּבַיהוָה בָּטַחְתִּי לֹא אֶמְעָד :

2 בְּחָנֵנִי יְהוָה וְנַסֵּנִי צְרוֺפָה צָרְפָה כִלְיוֺתַי וְלִבִּי :

3 כִּי־ חַסְדְּךָ לְנֶגֶד עֵינָי וְהִתְהַלַּכְתִּי בַּאֲמִתֶּךָ :

4 לֹא־ יָשַׁבְתִּי עִם־ מְתֵי־ שָׁוְא וְעִם נַעֲלָמִים לֹא אָבוֺא :

5 שָׂנֵאתִי קְהַל מְרֵעִים וְעִם־ רְשָׁעִים לֹא אֵשֵׁב :

6 אֶרְחַץ בְּנִקָּיוֺן כַּפָּי וַאֲסֹבְבָה אֶת־ מִזְבַּחֲךָ יְהוָה :

7 לַשְׁמִעַ בְּקוֺל תּוֺדָה וּלְסַפֵּר כָּל־ נִפְלְאוֺתֶיךָ :

8 יְהוָה אָהַבְתִּי מְעוֺן בֵּיתֶךָ וּמְקוֺם מִשְׁכַּן כְּבוֺדֶךָ :

9 אַל־ תֶּאֱסֹף עִם־ חַטָּאִים נַפְשִׁי וְעִם־ אַנְשֵׁי דָמִים חַיָּי :

10 אֲשֶׁר־ בִּידֵיהֶם זִמָּה וִימִינָם מָלְאָה שֹּׁחַד :

11 וַאֲנִי בְּתֻמִּי אֵלֵךְ פְּדֵנִי וְחָנֵּנִי :

12 רַגְלִי עָמְדָה בְמִישׁוֺר בְּמַקְהֵלִים אֲבָרֵךְ יְהוָה :

1/12 verses