PSA 88 | QuranAlive

19 verses

1 שִׁיר מִזְמוֺר לִבְנֵי קֹרַח לַמְנַצֵּחַ עַל־ מָחֲלַת לְעַנּוֺת מַשְׂכִּיל לְהֵימָן הָאֶזְרָחִי :

2 יְהוָה אֱלֹהֵי יְשׁוּעָתִי יוֺם־ צָעַקְתִּי בַלַּיְלָה נֶגְדֶּךָ :

3 תָּבוֺא לְפָנֶיךָ תְּפִלָּתִי הַטֵּה־ אָזְנְךָ לְרִנָּתִי :

4 כִּי־ שָׂבְעָה בְרָעוֺת נַפְשִׁי וְחַיַּי לִשְׁאוֺל הִגִּיעוּ :

5 נֶחְשַׁבְתִּי עִם־ יוֺרְדֵי בוֺר הָיִיתִי כְּגֶבֶר אֵין־ אֱיָל :

6 בַּמֵּתִים חָפְשִׁי כְּמוֺ חֲלָלִים שֹׁכְבֵי קֶבֶר אֲשֶׁר לֹא זְכַרְתָּם עוֺד וְהֵמָּה מִיָּדְךָ נִגְזָרוּ :

7 שַׁתַּנִי בְּבוֺר תַּחְתִּיּוֺת בְּמַחֲשַׁכִּים בִּמְצֹלוֺת :

8 עָלַי סָמְכָה חֲמָתֶךָ וְכָל־ מִשְׁבָּרֶיךָ עִנִּיתָ סֶּלָה :

9 הִרְחַקְתָּ מְיֻדָּעַי מִמֶּנִּי שַׁתַּנִי תוֺעֵבוֺת לָמוֺ כָּלֻא וְלֹא אֵצֵא :

10 עֵינִי דָאֲבָה מִנִּי עֹנִי קְרָאתִיךָ יְהוָה בְּכָל־ יוֺם שִׁטַּחְתִּי אֵלֶיךָ כַפָּי :

11 הֲלַמֵּתִים תַּעֲשֶׂה־ פֶּלֶא אִם־ רְפָאִים יָקוּמוּ יוֺדוּךָ סֶּלָה :

12 הַיְסֻפַּר בַּקֶּבֶר חַסְדֶּךָ אֱמוּנָתְךָ בָּאֲבַדּוֺן :

13 הֲיִוָּדַע בַּחֹשֶׁךְ פִּלְאֶךָ וְצִדְקָתְךָ בְּאֶרֶץ נְשִׁיָּה :

14 וַאֲנִי אֵלֶיךָ יְהוָה שִׁוַּעְתִּי וּבַבֹּקֶר תְּפִלָּתִי תְקַדְּמֶךָּ :

15 לָמָה יְהוָה תִּזְנַח נַפְשִׁי תַּסְתִּיר פָּנֶיךָ מִמֶּנִּי :

16 עָנִי אֲנִי וְגוֵֺעַ מִנֹּעַר נָשָׂאתִי אֵמֶיךָ אָפוּנָה :

17 עָלַי עָבְרוּ חֲרוֺנֶיךָ בִּעוּתֶיךָ צִמְּתוּתֻנִי :

18 סַבּוּנִי כַמַּיִם כָּל־ הַיּוֺם הִקִּיפוּ עָלַי יָחַד :

19 הִרְחַקְתָּ מִמֶּנִּי אֹהֵב וָרֵעַ מְיֻדָּעַי מַחְשָׁךְ :

1/19 verses